വേനല്‍ കടുക്കുന്നു; വൈദ്യുതി ആവശ്യകത 15 വര്‍ഷത്തിനിടയിലെ റെക്കോര്‍ഡ് നിലയില്‍

വേനല്‍ കടുത്തതോടെ ഇന്ത്യയിലെ വൈദ്യുതി ആവശ്യകത കുതിക്കുന്നു. ഫെബ്രുവരിയിലെ വൈദ്യുത ഉപഭോഗം 2 ശതമാനത്തോളം വര്‍ധിച്ച് 133 ബില്യണ്‍ യൂണിറ്റായി. കഴിഞ്ഞ വര്‍ഷം ഇതേ കാലയളവില്‍ ഇത് 131 ബില്യണ്‍ യൂണിറ്റ് ആയിരുന്നു. 2010 മുതല്‍ ഫെബ്രുവരി മാസത്തില്‍ രേഖപ്പെടുത്തിയ ഏറ്റവും ഉയര്‍ന്ന വൈദ്യുതി ഉപയോഗമാണിത്. വേനല്‍ കടുക്കുന്നതോടെ വൈദ്യുതി ഉപഭോഗം ഇനിയും കത്തിക്കയറും.

ക്രിസില്‍ ഇന്റലിജന്‍സ് പുറത്തിറക്കിയ റിപ്പോര്‍ട്ട് പ്രകാരം, രാജ്യത്തിന്റെ പല ഭാഗങ്ങളിലും സാധാരണയെക്കാള്‍ ഉയര്‍ന്ന താപനിലകള്‍ രേഖപ്പെടുത്തിയിട്ടുണ്ട്. ഇതേ തുടര്‍ന്ന് ഫാന്‍, എസി, കൂളര്‍ ഉപഭോഗം ഉയരുന്നതാണ് വൈദ്യുതി ആവശ്യകത ഉയരാന്‍ പ്രധാന കാരണമാവുന്നത്.

2026 സാമ്പത്തിക വര്‍ഷത്തില്‍, വൈദ്യുതി ആവശ്യകത വാര്‍ഷികാടിസ്ഥാനത്തില്‍ 11.5 ശതമാനം വരെ വര്‍ധിച്ച് 1,705 മുതല്‍ 1,715 ബില്യണ്‍ യൂണിറ്റ് വരെ എത്തുമെന്ന് ക്രിസില്‍ റിപ്പോര്‍ട്ട് വിലയിരുത്തുന്നു. കഠിനമായ ശൈത്യകാലം, സാമ്പത്തിക വര്‍ഷത്തിന്റെ അവസാന സമയത്ത് സാധാരണയെക്കാള്‍ ഉയര്‍ന്ന താപനില, സ്ഥിരമായ സാമ്പത്തിക വളര്‍ച്ച എന്നിവയാണ് വൈദ്യുതി ആവശ്യകത വര്‍ധിക്കാന്‍ കാരണമാവുന്നത്. അതേസമയം ദീര്‍ഘകാല മണ്‍സൂണ്‍ ഈ വര്‍ധനയെ ഭാഗികമായി നിയന്ത്രിക്കാമെന്നും റിപ്പോര്‍ട്ടില്‍ വ്യക്തമാക്കുന്നു.

ഫെബ്രുവരി തുടക്കത്തില്‍ ഇന്ത്യയിലെ വടക്കു കിഴക്കന്‍ സംസ്ഥാനങ്ങളിലെ തണുത്ത കാലാവസ്ഥ വൈദ്യുതി ഉപയോഗം കുറയ്ക്കാന്‍ കാരണമായിരുന്നെങ്കിലും പിന്നീട് താപനില ഉയര്‍ന്നതോടെ ഉപയോഗം വര്‍ധിച്ചു. ഫെബ്രുവരി 19 മുതല്‍ 25 വരെ, ഹിമാലയ മേഖലയിലും വടക്കു പടിഞ്ഞാറന്‍ ഇന്ത്യയിലെ സമതല പ്രദേശങ്ങളിലും പരമാവധി താപനില സാധാരണയെക്കാള്‍ 46° സെല്‍ഷ്യസ് വരെ ഉയര്‍ന്നിരുന്നു. എന്നാല്‍ രാജ്യത്തിന്റെ ഭൂരിഭാഗം ഭാഗങ്ങളിലും ഇതേ ആഴ്ചയിലെ ശരാശരി കുറഞ്ഞ താപനില 24° സെല്‍ഷ്യസ് വരെ കൂടുതലായിരുന്നു.

ക്രിസില്‍ റിപ്പോര്‍ട്ട് അനുസരിച്ച് ഏപ്രില്‍ മുതല്‍ ഫെബ്രുവരി വരെ മൊത്തം വൈദ്യുതി ആവശ്യകത വാര്‍ഷികാടിസ്ഥാനത്തില്‍ 0.9 ശതമാനം മാത്രമാണ് വര്‍ധിച്ചത്.

ഇതിനൊപ്പം തന്നെ രാജ്യത്തെ വ്യവസായ പ്രവര്‍ത്തനങ്ങളും വൈദ്യുതി ഉപയോഗ വര്‍ധനയില്‍ പ്രധാന പങ്കുവഹിച്ചു. ഇന്ത്യയിലെ നിര്‍മ്മാണ മേഖലയുടെ പ്രവര്‍ത്തനം ഫെബ്രുവരിയില്‍ കൂടുതല്‍ ശക്തമായിരുന്നു. ഫെബ്രുവരിയിലെ നിര്‍മാണ മേഖലയുടെ വാങ്ങല്‍ അടിസ്ഥാനമാക്കിയുള്ള സൂചിക അഥവാ മാനുഫാകിചറിംഗ് പിഎംഐ ജനുവരിയിലെ 55.4ല്‍ നിന്ന് 56.9 ആയി ഉയര്‍ന്നതും ഇതിന് സൂചനയാണ്.

വൈദ്യുതി ആവശ്യകത ഉയരുമ്പോള്‍, ഈ മേഖലയിലെ കമ്പനികള്‍ക്ക് അത് നേട്ടമാകും. എസി, കൂളര്‍ പോലുള്ളവ കൂടുതല്‍ വിറ്റഴിക്കപ്പെടും. മാത്രമല്ല ഇതുമായി ബന്ധപ്പെട്ട് നില്‍ക്കുന്ന കമ്പനികളുടെ ഓഹരി വിലയും ഉയര്‍ന്നേക്കും. വൈദ്യുതി ഉപയോഗം കൂടുമ്പോള്‍ വൈദ്യുതി ഉത്പാദനം, വിതരണം, വ്യാപാരം എന്നിവയും വര്‍ധിച്ചേക്കും. അതിലൂടെ കമ്പനികളുടെ വരുമാനം മെച്ചപ്പെടാന്‍ സാധ്യതയുണ്ട്.

Content Highlights: Higher temperatures and strong industrial activity pushed India’s electricity demand higher in February, with manufacturing PMI also showing solid growth.